उमरखेड: भारतरत्न डॉ. बाबासाहेब आंबेडकर यांच्या पुतळ्याच्या विद्रुपीकरणाचा प्रकार समोर आला असून, यामुळे स्थानिक नागरिकांमध्ये प्रचंड संताप व्यक्त होत आहे. नगरपरिषदेने या पुतळ्याची रंगरंगोटी करून सुशोभीकरण तर केले, पण सध्या हा पुतळा जाहिरातींच्या बॅनरमुळे पूर्णपणे झाकला गेला आहे.
पुतळ्याचे अस्तित्व धोक्यात: पुतळ्याच्या सभोवताली लावण्यात आलेल्या अनधिकृत बॅनरमुळे मुख्य रस्त्यावरून चालणाऱ्या नागरिकांना महामानवाचा पुतळा दिसतच नाहीये.
प्रशासनाचे दुर्लक्ष: सामाजिक कार्यकर्ते सिद्धार्थ दिवेकर यांनी अनेक महिन्यांपूर्वी हे बॅनर हटवण्यासाठी नगरपरिषदेकडे लेखी तक्रार केली होती. मात्र, प्रशासनाने यावर कोणतीही कारवाई केलेली नाही.
उडवाउडवीची उत्तरे: आज पुन्हा हा प्रश्न ऐरणीवर आला आहे. तक्रारकर्ते सिद्धार्थ दिवेकर यांनी नगरपरिषद कर्मचारी कृष्णा लांबटिळे यांच्याशी संपर्क साधला असता, त्यांनी एका नगरसेवकाचे नाव पुढे करून जबाबदारी झटकण्याचा प्रयत्न केला.
अधिकारी सुस्त: धक्कादायक बाब म्हणजे, या गंभीर विषयी मुख्य अधिकारी डॉ. अजय कुरवाडे यांना फोन केला असता त्यांनी प्रतिसाद दिला नाही.
“प्रशासनाच्या या उदासीनतेमुळे लोकांच्या भावना दुखावल्या जात आहेत. पुतळ्याच्या परिसरात एकही बॅनर असू नये, ही आमची स्पष्ट मागणी आहे. कारवाई होत नसल्यामुळेच आम्हाला ही बाब माध्यमांसमोर आणावी लागत आहे.” — सिद्धार्थ दिवेकर (शहराध्यक्ष, भीम टायगर सेना तथा पत्रकार) आता प्रश्न हाच उरतो की, प्रशासनाला जाग कधी येणार? महामानवाचा सन्मान राखण्यासाठी हे अडथळे तात्काळ दूर केले जातील का? याकडे सर्वांचे लक्ष लागले आहे.
